shkolakz.ru 1
Война… Ине война… Зяро сон сайсь эрямот, зяро валсь верь! Паз, иля макст тенек зярдояк тень неемс эсь сельмсэ, иля макст неемс минек эйкакшонок, нуцьканок туртовгак… Кинофильмань ваномсто, книгань ловномсто, мик коткудавт рунговат чийнезевить, зярдо евтневи те стака шкадонть. Стака ульнесь аволь ансяк тосо, косо мольсть тюрематне, но и фронтонь киксэнть те ёнояк.


А умок школань музейстэ саия ловномс Яков Слушкинэнь «Семья К очкуровых» книганзо, тосо авторось парсте невтизе Кочкурвелень эрямонть войнань шкасто. Седе тов истя жо карминь содамо тедеяк, што кой-кона романонь геройтне эште нейгак эрить, вейкесь эйстэдест монь сырькаем – покштянь патязо. Сон монень ламо евтнесь те стака шкадонть…

«Да, неть аватне, конань ланга сермады Яков Сергеевич, ульнинек минь – Кочкурвелень аватне, «Од веле» колхозонь роботыцятне.

Евтнеса автордонть сень, што сонзэ марто роботынь колхозсо, сон – председатель, мон – разноробочей. Колхозонь роботанть кис Яков Сергеевич путылизе оймензэ, ков бу аволинзеть кучо, свал мериль: «Ават, скоренька роботадо, скоренька велявтодо, вейке пильгенк тесэ, омбоцесь - тосо улезэ».

А ней евтнеса, кодамо стака савсь синдемс тенек велесэ войнань шкань иетнестэ. Хоть уш фронтось тей эзь юта, но минь тылсэ, велесэ, изнявксонть чавинек истя жо.

Паро эрямось тыненк менельстэ эзь пра, сонзэ кисэ ламот путызь пряст, ламо ливезь валынек и велесэ. Паро трактортнэнь саизь фронтов, мельгаст алашатненьгак. Колхозсо жо кадовсть кой-кодат, карминек тонавтомо букатнень, скалтнэнь сокамо. Сокилинек букасо, скалсо ве плугсо. Прыль ракшась, кодаяк а стявтови. Мейле кармасть явшамо тенек соткань сотка чис - чувомс, кочкомс.Паксятне беряньстэ ульнесть роботазь, сюрось сэрейстэ а касыль, савиль тенек таргазь таргамс. Мезе урядави сюрось, провожилинек фронтов. Ярсамс ульнесь а мезде, кшись ламонь ульнесь тикшень, теяк аволь сатомга.

А кода видемс видьменть пачтилинек Атяшевасто? Лангсо, нуцькинем. 20 килот каить кескавозот ды кандт, кода маштат. Оймсеме лоткат, кургозот а мерить каямс зернадонть. Пильгтнесэ карть, пильгтне пачк начкить. Трактортнэнень горючеенть истя жо лангсо кантнинек, эли жо букасо.

А кода фронсто кулят училинек! Зярдо минексетненень савсь потамс Москов ошонть алов, седеесь эзь маштово. Велень грамотной ломантне евтнесть тенек теде, што ламо ошт кадозь ятонтень. Стака кев лепштиль седееть. Но зярдо кармасть пачкодеме кулят: минек армиясь лоткась потамодо - тылсэ важодемаськак кармась улеме ков седе шожда. Сыль, бувала, прявтось малазонок ды мериль: «Ават, минек частне саизь те …ошонть, те… областенть». Кадык роботаськак стакаль, пекеськак вачоль, ялатеке седеентень ков седе шождаль.


Ули мелем евтнемс седеяк, кода фронтонтень анокстынек лембе оршамопельть. Чинь чоп якшамосонть роботатано, а чокшне ланга варьгат, носкат кодатано, вельсоветэнь ломанть ютыть, пурнасызь, кучсызь.

Калмамонь коневтнэ сыльть сеедьстэ. Лиясто чизэнзэ аволь вейкеяк. Веленек мелявтылинек чавозенть семиянзо марто, явилинек те стака кулянть.

Вана истя, Наташа, эринек те стака шкастонть…» - друк сырькаем лоткась, а мейле евтнеманзо поладызе лайшемасо, мартонзо авардинь монгак.

Да, кода корты сырькаем, паро эрямось тенек менельстэ эзь пра. Миненек, од ломантненень, эряви ванстомс те уцясканть мезе вийсэ. Минек енксонь поэтэнть А.Араповонь ули стихотворениязо, косо авторось арси тенек а неемс война зярдояк, сонзэ эйсэ прядовлия сочинениямгак.

Кадык апак мелявто ды пейдезь,

Мазый цецят тейтерькась пурны.

Кадык минек модась пурьгинеде,

Ансяк аволь бомбадо сорны...

Кадык лисни паломо эждямо

Эрьва валске пандонть экшстэ чись,

Маней менель тонеть, вишка ломань,

Кадык валдо ули свал тонь кись.


Муниципальное общебразовательное учреждение «Кочкуровская средняя общеобразовательная школа» Дубенского мунципального района Республики Мордовия


«Кадык минек модась пурьгинеде,

Ансяк аволь бомбадо сорны…»

сочинениясь


Сермадызе


6-це классонь тонавтницясь Наумкина Наташа

Тонавтыцясь

Юртайкина С.И.