shkolakz.ru 1
ТЕМАСЬ: «ВЕЛЕНЬ КОЕНЬКЕ»



Цельхне: - кемокстамс содамошиснон эсь велень иласнон колга;

- касфтомс кельгомаснон эсь койснонды, иласнонды;

Калядамань и таусямань моротне ушеткшневсть калядамань шиста, Роштувада инголе. Тя шиста калядакшнесть, таусякшнесть аф аньцек шабатне, но и од стирьхне-цёратне, од аватне и од алятне. Мораманкса эрь кудста макссесть тувонь пилькт, пяштенят, пидеф цюкорнят, копшат.

Ичкозде маряви морамань вайгяль. Кудса азорсь и азоравась озафт шра ваксс и ярхцайхть. Сувайхть кудти морайхне.

Инжиень вятись: (Сюконяй азорхненди и корхтай):

Шумбратада, азор и азорава. Улеза кшинте – салонте, а инжихненди пара валонте.

Азоравась: Шумбратада тинцьке. Сувада, озседа. Сембонди тяса муви васта, ляпе и лямбе вал.

Азорсь: Ладявсь ли вастонте, кельгома инжихть, сембонди ли сатсь васта?

Инжихнень эзда фкясь: «Тейнек сатсь, тяза уле тесна азорхненди».

Азоравась:
Спасиба, што суваде пялонк, почитандасамасть оцю праздниконь карша. Вдь моли Роштувань недлясь. Сяс надиятама, што суваде аф стак, а кандоде мархтонк морот, кштимат.

Инжиень вятись: Видеце, азорава, минь анокламе и кувака морот и сиде моронят. ( Морави морось « Кудат» Муз. Митинонь, валхне Черняевонь.

Акша ловнясь вярде прай,

Горняй пайкне марявихть

Кинди, шта кудатне сайхть –

Дарянди аль Марянди?

Припевсь: Ой, баян, баян, баян,

Кодама удалафат!

Катк ни тапсесазь кить-янть

Ширезонк кудалайхне.

2. Шачи сёроть касфтоськ лац,

Шида-парда няйхтяма.

Свадьбать ётафтсаськ иланц,

Клёк рьвянят сяфтама!

3. Учсетяма аф куватьс –

Ортати ки тяйхтяма,

Туй од стиреньке рьвакс,

Паваз тяштенц няйхтяма.

Инжихнень эзда фкясь: Ялгат, а вдь ня шитнень содафнихть. Настякай, азонтк, кода тинь эсь пингстонт содафнеде, азонтк сяньге, кода сотцесть сай пингонь васянтень-полантень, эрямантень-ащемантень.


Азоравась:
Эрь ина, кулхцондода. Миньге улеме однат, кода и тинь. И тейнековок сашендовсь содафнемс и сотцемс сай пингонь васяньконь-поланьконь. 1. Лисендеме калдазу, кунцеме учат, сараст, атякшт. 2. Лисендеме садняв, сускондоме марлюс и кулхцондоме. Кона пяле увазеви пине, ся пяли сявсамазь рьвакс. 3. Сувсеме седялу и ванома вельде сотцеськ цебярь ули мирдсь или аф. И тиендевсь тя пяле вешкада. Аф пельхтяда?

Азорсь : Арьда, няфтьсайне, косот жуватаньке, саразоньке.

Азоравась: Алдуня, а мес тон ашеть ту, кали тейть аф интересна содамс суженнайцень?

Алдунясь: А монь мялезе сонь содамс лиякс, эсь лацон. (Азоравась арай шири, а стирнясь озай шрать ваксс, сяви кядезонза зрнянь суркскя и ушеды мезень-бди колга арьсема.

Азоравась ушеды корхтама:

Од кизонь карша сядонгольдень шитнень,

Мзярда даволсь ашкоряль вельпеть,

Эсь кудсост стирьхне кельгомаснон питненц

Штатолня карша соцсеккшнельхце веть.

И тонга ся кунардонь койхнень коряс

Штатол крьвястеть путоть стопка ведь

И, штоба тейть ни кивок афоль шоря,

Вальмалу кадыть ванфтынякс илядть

Трванятне цють келептьфт панчфкя лаца,

Люпштаф сурбенязт золотань суркскя,

Руцяня лапотьф локстинь акша пацякс,

А ёньцот-мяльсот арьсемаце фкя.


Стирнясь-Алдунясь: Тон, ару ведь, канф сисем лихтибряста,

Няфтьк поланязень шамаликонц тязк,

Азк, васьфтьса сонь мзярда эсь кибрястон

И павазуфт ульхтяма- ль, сяньге азк…


(Тя пингть кие-бди ёрдай лов бокольня, стирнясь эводи и кяши. И тяка пингть марявихть таусямань вайгяльхть)

Тавуси! Тавуси!

Сялдазт бурдауси

Талалай –талалай,

Щакай шачфт Миколай!

Аф Миколай – Проса,

Пяштенятне коса?

Сяканяса – лапаняса

Тейнек лихтить шаваняса

Аф пяштенят – пангонят

Улест ваи лангонят

( Азоравась сифтемста сяви пяштенят и макссыне шабатненди. Синь азыхть спасиба и туйхть). Панжеви кенкшсь и шумназь, рахазь сувайхть содафни стирнятне. Кинь кядьса сараз, кинь понат, кинь атякш. А фкя стирнясь сувафты мархтонза уча. Мзярда аньцек сувайхть, учась стяй и мярьги: «Тяни тон тейне рьвакс туят» Стирнясь визделгоды, сяряфтьсы цёранять, сембе рахайхть.

Азоравась азонды атякшть колга. Шра лангс путф ведь, каяфт зёрнат и ванома. Стяфтсазь атякшть шрать лангс и учихть, мезе сон тии. Кда ушеды симома, то мирдсь ули сими, кда варжай ваномати, то ули чуван, кда ушеды пупстыяма зёрнатнень, ули тевонь кельги, пара вайме.

Азонды понатнень квалма. Равжа понатне – равжа мирдсь, акшет – акша, шаржуфт – сире, тюжат – рыжай.

Азорсь-азоравати: « Эрь ни, саты дразнямс стирнятнень, пара ули, кда морсетяда и кштитяда, кельгома инжиеньке».

Инжиень вятись: « Давайте кельгома мороняняньконь морасаськ» Морасазь « Луганяса келунять», а ниле стирнят кштихть.

Инжиень вятись: «Спасиба тейнть, азор и азорава. Спасиба кшинкса-салонкса, спасиба пара валонкса. Пинге ни тумс. Эряда павазуста, уледа шумбранят»

Азорхне: Спасиба, што сашендоде, уледа тинцьке шумбранят и павазуфт. Сашендода!


ТЕМАСЬ: «Эрясть-ащесть атят-бабат»


Цельхне:- кемокстамс содамошиснон мокшэрзянь ёфкснень коряс;

- касфтомс кельгомаснон мокшэрзянь ёфксненди


Оборудованиясь: 1.Стенд «Ёфксонь масторса»

Стендти петфнемс ся иллюстрациятнень, конатнень тиезь шабатне. Доскать ваксса повфтафт В.М. Васнецовонь «Алёнушка» и «Богатырьхть» картинанза. Ф.Беззубовань и Е.Кривошеевань портретсна. Илать вятьсазь кафта ведущайхть, конат наряжафт мокшень панарса.

Вечерть молемац.


  1. Вечерть пара ушедомс мокшень народнай моронь кулхцондозь.

  2. Сяда меле морайхть ученикне кафта морот «Луганяса келунясь» и «Вай, луга, луга»

I-це ведущайсь Монь койсон, аш стама шаба, кона афолезень кельге ёфкснень. Корней Чуковскяй корхнесь: «Кда шабати ёфси аф азонкшнемс ёфкс, сон сонць кармай синь латцемост»

II- це ведущайсь Ёфкснень эса лама вастта, коса геройсь няфневи пяк вииста, пяк ёнюста, а кда сонь обжасазь, тейнза лездыхть нльне волшебнай валхне. А шабась ёмласта тяфтамкс ёрай и улемс: сембода оцюкс, сембода виикс, сембода ёнюкс.

I-це ведущайсь Народнай ёфкснень, моротнень, содама ёфкснень, валмуворкснень и поговоркатнень содасазь атятне и бабатне, оцюфне и ёмлатне. Вов кодама ёфкст азондсть синь тейнек.

Ученикне азондыхть ёфкст, конатнень синь кулезь эсь тядяснон или щаваснон эзда, азсазь, кодама морот морсесть велесост кунардонь пингть, азыхть содама ёфкст, конат эвондасть тяфта жа пяк кунара, валмуворкс и поговоркат.

II-це ведущайсь Но аф сембе содасасть, конашкава питнихть народть ёткса латцеф тя произведениятне.

I-це ведущайсь. Синь ушедсть латцема пяк кунара. Сиретне азонкшнезь оттненди, оттне сиретькшнесть, синь тяфта жа азонкшнезь оттненди, и тяфта векста векс, поколенияста поколенияс. Сяс ня произведениятненди мярьгихть народнайхть, сяс синь пяк питнихть, сяс синь эрявихть ванфтомс.

II-це ведущайсь Вов кодама моронят морсесть и морсихть тянивок сире ломаттне эсь унокснонды, мзярда матнесазь удома.

1-це учениксь:

-Чикор, чикор, сязьгата,

Азка, тячи ков якать?

-Якань тячи колама,

Ваи пачань нолама.

- Чикор, чикор, сязьгата,

Азка, нинге ков якать?

-Якань ловонь срафнема,

Сань Васёкть нюряфнема.

-Азка, чикор, сязьгата,


Нинге месть Васёкти сать?

Сельмонь стама.

Матта, Васьканязе, бай,

А то бобуняське сай.

2-це учениксь: Ой, бавуня, бавуня,

Ёмланязе баяка,

Ой, бавуня, бавуня,

Тядяцень тяк маята,

Аляце тусь Питери

Сирень-сиянь кандома –

Иделексонь андома.

Бавак, бавак, акшеняй,

Бавак мазы маконяй,

Идняйконяй, тяконяй,

Ваймафксонь аф максыняй,

Бавак, бавак, ёмланяй,

Курок сай ни аляце,

Удок, кстыняй, комляняй,

Тейнек канды калаця.

1-це учениксь: Удок, удок лефкскязе,

Удок, касы келуняй,

Келусь касы менельти,

Корятть нолдай модати,

Тонга касат оцюста,

Якама кармат модава,

Лиендема кожфкава.

Ёньда лама сайхть тонь прязт,

Кармайхть сельмодема ряц

Колькань Мишац, ватта ни,

Вярьге орёлкс лиенди;

Тон орёлонь ванфса ватт,

Кда эцихть вракне – патть.

Геройкс эста арат тонць,-

Сембе оттненди законць!

Сёрма кучат: «Учемасть,

Кафта недляс отпуск макссть.

Учте ямксонь пачаса,

Кафта пяльде ватьфкаса,

Учте туста позаса –

Сембось ули моркш лангса.

Ай, машина, ду-ду-ду,

Монь цёразень тук куду.

Ай, баюня, баюня,

Баю мака панчфкязе,

Удок, удок, цёраняй,

Удок, мазы ёроняй.


I-це ведущайсь А вов кода кштифнесазь ёмланятнень, штоба афольхть аварде, или кштифтьсазь кельгомга.

1-це учениксь. Цингор, цингор, пайгонязе,

Лишмонязе арды,

Сембонди сударды.

Сонь дуганяц аф простой,

Сонь дуганяц золотой,

Дуганясонза пайгонясь.

Пагонязе горь, горь, горь,

Арды лишмоса Григорь,

Арды ломань вели,

Эсь щаванянц пяли,

Щавац азы ляпе вал,

Щавац максы мазы ал.


II –це ведущайсь. Ёфксне сембодонга кельговиксне, сембодонга интереснайхне. Минь инголенк оцю задача: ванфтомс семботь, мезсь апак печатлак, мезть аф сембе содасазь. Мон корхтан ёфкснень, моротнень, содама ёфкснень, валмуворкснень, поговоркатнень колга, конат шачсть минь велесонк. Эряви якамс сиренятнень пяли и кизефнемс, кодама ёфкст и морот азондсть и морсесть тейст, мзярда синць ульсть ёмланят и азондозь ли синь эсь шабаснонды и унокснонды. Минь тянь мархта тихтяма пяк пара тев, вдь минь ванфтсаськ устно-народнай творчестваньконь.

А мезенди синь эрявихть ванфтомс? Кодама васта синь занцихть ломаттнень эряфса?

1-це учениксь: Ёфксне ломаттнень эряфса занцихть оцю васта . Ёфкста ломаттне содайхть лама; оцюфне синь азонкшнесазь ёмлатненди, иттне фкя-фкянди, ёфксне можна лувомс и книгаста, ваномс телевизорста…

2- це учениксь: Эрь народть улихть сонцень ёфксонза. Синь эсост няевихть ломаттнень кунардонь пингонь арьсемасна, мяльсна.

3-це учениксь: Ёфксонь геройкс сидеста эряйхть ломаттне и животнайхне. Но сембода интереснайхне, монь койсон, тя волшебнай ёфксне. Синь эсост пяк лама фантастикада, эсь арьсефта.

4-це учениксь: Ёфкснень вельде ломаттне тонафнесть няемонза и кельгомонза цебярть. Ёфксне лездыхть тейнек лац содамс эрь народть эряфонц.

I –це ведущайсь Пяк цебярь ёфкст тейнек сёрмадсь Ф. Атянин, кепотьксонди, «Сельведь-богатырь»; Куляскин «Пичай» и лиятне. А тяни ванода инсценированнай пялькс Куляскинонь «Пичай» ёфксста.

Кода няфтьф бабась ёфксста?

1-це учениксь: Бабась тя ёфксса и весяла, и кяжи. Кяжи бабань мархта мон васетькшнень А. С. Пушкинонь « Сказка о рыбаке и рыбке» ёфкссонза.


2-це учениксь: А мон лама ёфксса васетькшнень уроз стирня мархта, конань ашельхть тядянза-алянза. Например: «Од ава», « Золушка». Нят ёфксне малацект. Тейст малацект нинге « Алёнушка» картинась. Тя стирнять аш тядяц, и аф родной тядясь панезе сонь кудста. Стирнясь тусь ков няихть сельмонза…

II- це ведущайсь А нинге кодама малацек геройхть минь тяса няйхтяма?

3-це учениксь. А мон няян тяста богатырень обраст. Богатырьхнень минь васьфнесайнек и мокшень, и рузонь, и лия масторонь ёфкснень эзда. Сембе содасаськ Ф.Атянинонь « Сельведь-богатырь» ёфксонц. Вов сон. Сембе минь морафнеськ « Цёра – богатырь» ёфксть, коса богатырсь тюри 3, 6, 12 пряса куйхнень мархта и сяськсыне синь. Но мон ёран азондомс тейнть « Богатырьхть» картинать колга, конань лама-лама кизода инголе сёрмадозе В. М. Васнецов. Кие ульсь Васнецов? Тя содаф рузонь художник. Шачсь 1848 кизоня. Сонь творчестванцты оцю лезкс макссь устно-народнай творчествась. Сон произведениянза сёрматфт ёфксонь и былинань коряс. Васнецов рисовандась тяфтама цебярь картинат, кода,

« Ковёр-самолёт», « Витязь у дороги», « Алёнушка», « Богатырьхть», « Царевна-лягушка» и лият. Биографияц ушеды сонь эста, мзярда 19 кизоса цёрась ёразе сембе эряфонц максомс искусствати. 1867 кизоня сон аделазе духовнай семинариять, но попокс улемс ашезь ёра, ашель мялец.. Васнецов кадозе шачема вастонц и сась Петербургу. Лядсть фталу велец, кудсна, коса лама кулендсть богатырьхнень, ведьматнень кудаватнень колга. Сон шачема велесонза, коса ётась идькс и одкс пингоц, ламоль ёфксонь азондыда, морайда, а Петербургса сембось ульсь лия. Васнецов экзаменонзон максозень, но тонафнема изь карма, а кармась лездома тядянцты и алянцты, сяс мес семьясна оцюволь.. Васнецов пяк кельгозень богатырьхнень колга ёфкснень. И вов 1876 кизоня, ичкозе эсь шачема-касома вастонц эзда ушеды работама эсь сембода цебярь « Богатырьхть» картинанац лангса.

Но аньцек тоса тяфтама васта, простор, штоба синь сяда лац и мазыста няфтемс. Сон мрдай эсь шачема вастозонза, муй эрявикс васта и ушеды работама. Ванода, богатырьхне кодама сери вастса няфтьфт. Кели мяштьсна и кшнинь кольчугаснон ала кяшендьсазь почти сембе горизонтть. Тя богатырьхне анокт эрь минутаня максомс лезкс сятненди, конатнень эса обжайхть.


Пяк цебярь картина кадсь тейнек Виктор Михайлович Васнецов. Тя картинать лангса художниксь работась комсь киза.

I-це ведущайсь. А тяни ётафттама викторина тяфтама тема лангс: «Содасайть ли тон мокшэрзянь ёфкснень?» Арьседа, кодама ёфксста сявфт ня валхне?

1. Эрясть-ащесть атят-бабат…

2. Моли, а сонць станя арьси, седиец ризнай. Пачкодсь куду. Сувась пирьфозонза. Рьвац лисссь каршезонза, кядь нучксонза потяй идня. Алясь эстокиге шарьхкодсь.

3. Мольсь сон тяфта ламос, ламос,

Пачкодсь сери панда шамас,

Ваны, тяйф тя панда прясь,

Аяш фкявок тишеня.

4.Сотозе пинеть пиксса крандазти да локшеса сонь: «Пинесь лёкшкоды, тоса вяри-вяри комоти, а мянць, тусь ардозь мезе ули виец куду.

5. Яфодсь богатырьсь весть байдексас - куйть ляцсть кафта прянза.

Яфодсь омбоцеда – тага ляцсть куйть кафта прянза.

6. Кудса Ягорти 7.Вирти архт веть тон

Шайтан рьвац Толдише кантт.

Изгордозь корхни Толдише ведьта

« Ащан аф лац» Симозь пчкан.

II-це ведущайсь. А тяни минь васеттяма нинге фкя ёфкс мархта. Тя – « Сиянь эрьхконя», конань сёрмадозе Ф.Атянин.

Идезе Байка охотниксь Цяцянять кяжи Ватыркайть кядьста. Лажназевсь стирнясь, мзярда прважазе цёрать, кона надияфтсь самс Ванды. Учи Цяцяня, пяк учи. Но мезе тя?

(Сценав валомня шашаты колдуньясь Ватыркай. Сон ашкодозе Цяцянять сеткаса пильгонек прянек: «Ну, вов, гуленяй, тяни аф мянят, тяни аш кинди тонь идемс, кельгомаце ичкозе». Тя пингть эвондась сонь цёрац Куеньбрясь и Цецянять салазь шобда ущельяв. Аньцек сире сеельсь и шуфттне няезь, мезе лиссь Вирявать стирнянц мархта.

( Панжеви занавесь. Сцена лангса кштихть стирнят мокшень нарядса. Ширеняса няеви Цяцяня. Инголенза эвондай Ватыркай. Стирнясь валомня стяй.

Ватыркай: Сргозеть, кельгомняй. Кода пара, кода мон кенярдень. Кулхцондомак монь, стирькай. Мон вдь аньцек пара арьсян. Тон ёнюнят и мазынят. Мон шарьхкодьса, тонь аш мяльце эрямс тя начка и шобда вастть эса. Но кда лиясят цёразенди рьвакс, то кармат эряма дворецса.


Сявсь кядезонза бабсь наксада моргу байдек и эрьхтезе масторти. Крьвязсь светсь, кармась няевома шра, а шрать лангса кодама аньцек ярхцамбяль ашель. Ватыркай кшмияй Цяцянять эса шрать шири, а сонць корхтай: « Сифть, Цяцяня, цюкорня, сипть ламбама позада

I-це ведущайсь Коськсть Цяцянять трванянза, пяк сась сонь симомац. Но Цяцянясь аф стак ульсь Вирявать стирец. Сон лац содазе, што кда сиви цюкорня или сими бозада, сон семботь юкстасы. Но Цяцяня верондась, што сайхть идемонза .

II – це ведущайсь 1. А тяни азость, кинь кодама кельгома ёфксоц. Мес сон тусь мялезонт?


  1. Мес Лёсанять лемдезь Сельведь-богатырькс?

  2. Кодама пара вайме и кяжи геройхть васьфтеде Ф. Атянинонь ёфксста ?

  3. Кодама ёфксса няфтьф рузонь народть лезксоц мокшэрзянь народти ?



ОЛИМПИАДА РОДНОЙ ЛИТЕРАТУРАСА 8-9 кл.


(Олимпиадась ётафтови урокта меле. Жюрити сувайхть 3 ломатть)


Олимпиалась ушеды стихотворениянь азондозь, конатнень синць музь и тонафнезь. Стихотворениятне мокшень кяльть колга.

  1. 1. 8 – це кл. учениксь азонды Н. Учватовонь стихотворениянц « Мокшень кяленьке»

Мокшень кяль!

Тон мазы валонь корам!

Арать тейне вечнай ялгакс,

Пара мялень азыкс, моронь морайкс,

Оржа спорса сединь сялгикс.

Эряфозон тон аф вихца эцеть,

И аф ётамбачк угадять

Шабакскиге марстот кяденьбецек

Мольхтяма минь азоркс ладязь.

Вятись тон, тон содамошинь валдти

Лихтемайть и верондафтозь мярьготь:

Сюконякшнек тядянь–алянь валти

Ванфтк сонь векозт, кантк сонь вярьгак»

Мон и кандса. Пяк пси седи лаца

Апак лотксек пиксы мяштьсон.

А кулан, лиянди сонь и кадса

Оцю эрьгянь машты тяштекс.



  1. 9 кл. учениксь азонды С.Самошкинонь «Мокшень кяль» стихотворениястонза пакш.


Ётась лама киза, тяла

Ризфтта, радостьта аф фкяль,

Но мондейне мокшень кяльсь

Цебярь ялгакс улендсь яла.

Вири, паксяв ли туян,

Сёронь, кстыень таньфкять марсян

Или книжканя луван,

Или мороня мон арьсян,-

Мокшень валнят эзк муян.

А вдь улихть стаптка ётксонк,

Содайхть, пешкотькшнихть прянь шназь;

« Сиредсь кяленьке! Сон ёрдамс!»

Ёнюкс пряснон лувондсазь.

Ванат тяфтапне лияста

Сяшка кепсихть шум и спор,

Мярьгат, кяльсь – тя ташта ор,

Сявк и ёрдак лафтубряста.

Кда тянь аф ёню тисы

Мярьктяма, аф оцю канкссь,

Кальдяв ся, - учёнай лиси

И врьгяти кяленц лангс.

А тейне питни и ужяль

Мокшень койсь и мокшень кяльсь.


  1. Участникне азондыхть валмуворкст и поговоркат мокшень кяльть колга:

а) мокшень кяльсь - мокшетнень родной кяльсна, кона ётась касомань и вииямань пяк куваака киге

б) мокшень кяльсь - минь родной кяленьке, конань эряви содамс, кельгомс и пяконе ванфтомс

в) вай, мокшень кяль, тон конашкава валдат!



  1. 1. Няфтемс писателень и поэтонь портрет, а участникне азсазь кит синць и мезе сёрмадсть ( В. Мишанина, В. Ардеев, Н. Голенков, А. Ежов, Г. Пинясов…)

2. Сяда меле учительсь азонды писателень и поэтонь фвмилият, а участникне азсазь, кодама произведенияснон тонафнезь

Ф. Атянин (…) В. Радин (…)

К.Абрамов (…) Д. Куляскин (…)

Я.Григошин (…) М. Кяшкин (…)

3. Кодама произведенияста сявф тя пакшсь, кие сонь автороц?

Менельть вельхтязь сенем щамсонза,


Модась ваннезе эсь нюрямсонза

Анцяй кельмода шинясь, кородсь сон,

Тейнза морсезень вирсь эсь моронзон.


  1. Азомс, кие сонць М. Е. Евсевьев, мезе сонь колганза содатада?

  2. Кие сёрмадозе васенце букварть?

  3. Азомс, кие сонць М. Девятаев. Коса шачсь и мезенкса тейнза максозь Советскяй Союзонь Геройнь лемть?



  1. 1. Азомс, мезти мяроьгихть диалог? Монолог? Валмувркс? Поговоркат?

2. Эрь участниксь азы 3 валмуворкс или поговоркат любой темас.

3. Кие азозень ня валхнень?

« Кодама мазыхть и кодама цебярьхть народнай ёфксне. Синь золотадонга питнихть»

  1. Азомс мокшэрзянь писательхнень и поэтттнень фамилияснон, кит ульсть репрессировандафт.

  2. Азомс, мезе тонафни устнай народнай творчествась?

  3. Ули или аш легенда велентень колга?




  1. 1. Азомс васенце мокшэрзянь учёнайхнень фамилияснон.

2. Азомс «Песни и думы народного учителя» книгать сёрмадыенц.

3. Азомс мокшэрзянь литературать ушедыензон фамилияснон.

4. Азомс писателень и поэтонь фамилият, конат сувасть мокшэрзянь литературати революцияда меле ( Кузнецов, Тяпаев, Кудашкин, Кинякин, Малькин…)

5. Кодама оцю повесть сёрмадсь В. Мишанина?(« Пингонь ортат»

V. 1. Азомс валмуворкснень омбоце пяльксснон:

а) Мезе видят, сянь…

б) Мезе мяльсот, ся…

в) Рана стяят –

г) Стака тонафнемс –

2. Ётафтомс валмуворкснень рузонь кяльс

а) Аш ялгаце–мук, муть – ванфтк.

б) Ванфтк честцень одста.

в) Сисемксть ункстак, весть керк.

3. Учительсь азы содама ёфкст, ученикне содасазь синь

а) Даря и Маря каршек ваныхть,


Вестевок аф васедихть.

б) Ломанць оцю

Молят тейнза, сюконяй

Аф молят – аф сюконяй.

в) Вирь трваса максомс стирь

Эрь тунданя аварди

г) Кяльста кяльс – кяль тарадс,

Цють аф сенем кеподи.

д) Ингольцетне нюрьхкянят,

А фталцетне кувакат.

5. Сяльде эрь командась фкя-фкянди азыхть содама ёфкст.


  1. Эрь участниксь азонды сонцень кельгома писателенц или поэтонц колга. Кда поэт, наизусть азонды кельгома стихотворениянц, кда писатель, то повестенцты или рассказонцты аноконди сёрмады отзыв и лувсы олимпиадаса.

  2. Отзывть можна сёрмадомс тяфтама планонь коряс.

Планць (примернай)

  1. Кодама рассказ или повесть или роман морафтоть?

  2. Кие сонь сёрмадозе?

  3. Главнай геройсь.

  4. Мезть колга или кинь колга азондови?

  5. Коса моли действиясь?

  6. Кие геройхнень эзда сембода пяк тусь мялезот? Мес? Кие изь ту мялезот? Мес?

  7. Мезе арьсят геройхнень колга?



КВН РОДНОЙ ЛИТЕРАТУРАСА 7-8 кл.

(КВН-ць ётафтови класса урокта меле. Жюрити сувайхть учительхть и 9 кл. ученикт)

Налхкихненди максовихть фкя лаца заданият.


I-це заданиясь. Азомс высказываният мокшень кяльть колга

1-це командась 2-це командась

а)Мазы кяленьке, ияк мазы Шачем кяленьке-

Тундань варьхмодема лаца Валда мяленьке

Кода питни, питни казне Тядякс-тряйавакс

Кода марлю панжи садса. Тейнек ванфтома.

б) Шабакс пингонь кяльнязе б) Вай, мокшень кяль,

Цебярня и мазыня Тон конашкава валдат!

Мон тя кяльса васенда

«Тядяй» валнять азыне.

Кие сёрмадозень ня валхнень?


II-це заданиясь

1. Няфтемс М. Безбородовонь портретонц, содасазь или аф?

2. Азомс, кодама произведениянц тонафнезь.

3. Азондомс наизусть стихотворениянц, конань тонафнезь самостоятельна.


III –це заданиясь. 1. Кинь произведениянзон ётасть 5-це класса? Азондомс С. Кинякинонь, Я.Пинясовонь биографияснон.

2. Азомс, кодама произведенияста, кие сёрмадозе?

а) Састь траксне, кандсть лофцонь шине, пуромонь да сяськонь рой. Састь прянь щуказь да пулонь яфиезь, кенордасть эшеняти да ламбама клеверти. Синь бта афи мольсть, шудесть эй мархта шуди тундань ведькс. Фкя-фкянь лангс врьгятнесть сюросост, парасть кяжиста.

б) Смоленскяй перьф эряйхнень модасна толфтома шяйсть- рязсть фашисттнень пильгалост. Бомбаса и петляса эвфнесть тостонь ломаттнень эса равжа свастика мархта молодчикне, штоба синдемс рузонь народть волянц.

в) Эрзянь аватне келу луганяс

Кочкасть шра тейст, ярхцамс анокласть,

Вии пуре кандсть, медьта андозь синь.

Сембе каванязь пара алятнень

Пуре кандсть тейст сиянь карьхкаса,

Пидесть синь инксост мазы од стирьхне,

Эсост каванясть, сембе аватне.


IV – заданиясь. Азомс, кодама произведенияста ня иллюстрациятне.


V – заданиясь.

1-це командась 2-це командась

1.Мезти мярьгихть диалог? Монолог?

2. Мезти мярьгихть валмувркст? Поговоркат?

3. Эрь командась азы колма валмуворкст и поговоркат.

4. Содамс прянь синнемкатнень, объясняндамс синь смузьснон.


VI – це заданиясь. 1. Азомс, мезе тонафни устнай народнай творчествась? Кие сяда курок азсы.

2. Кода содави, што тя или тона произведениясь ёфкс?

3. Кодама группава явовихть мокшэрзянь ёфксне?

4. Эрь командазь азы колма содама ёфкст.

5. Эрь командась морай мокшень мора.


6. Азомс валмуворкснень омбоце пяльксснон

а) Ляпста ацай, да …

б) Тонафнемась валдаши - …

г) Век эряк, …

д) Стака тонафнемс - …

е) Рана стяят -…

Мезе мяльсот, ся …

Мезе видят, сянь …


VII – це заданиясь

1. Азомс васенце мокшэрзянь учёнайхнень

2. Азондомс наизусть стихотворения….


ТЯШТЕНЬ ПИНГЕ

(Проверяк эсь пряцень. Ётафтови 9 кл)

ТЕМАСЬ: «Пялькстамась – обобщениясь.

ЦЕЛЬСЬ: -проверямс ученикнень содамошиснон ,

-лятфтамс писательхнень и синь произведенияснон, конатнень тонафнезь 8-9 кл.

Налхкомать молемац.

1. Путфт писательхнень портретсна ( Ф.Чеснаков, А.Щеглов, А. Мокшони, П. Кириллов, Н. Иркаев, Л. Макулов, Г. Меркушкин).


I-це турсь

1) Мзяроцесь Н. Иркаевонь портретоц?

2) Кие сёрмадозе « Ялгань инкса» рассказть? – А. Щеглов

3) Кинь произведенияста Петр Звонарёвсь? – Ф. Чеснаковонь «Кафта киге»

4)Азомс, кодама произведенияста ня валхне? Кие тя произведениять сёрмадозе?

…1941 кизось. Китне пяшксет фашисттнень эзда ворьгоди ломаньда. Ворьгодихть – кие кода машты: ялга, автомашинаса, алашаса, бука лангса. Вона арды товарнай поезд. Сон пяшксе идьта, авада, сире ломаньда. Сембе муцяфт ардомать, то и тев пяяри бомбатнень сязендевомаснон эзда. Рана шобдава поездсь сувась станцияв. Панжевсть вагон кенкшне, и … ломаттне эводезь потазевсть фталу: перронть лангса пулхксть фашистт… (А.Щеглов «Ялгань инкса»)

5). Кона писательть повестьса главнай геройсь Михаил Тумов? ( Г.Я. Меркушкинонь)

6). Кона писательть тядяц ульсь содаф мокшэрзянь сказительница?

7). Кие сёрмадозе « Мокшень стирь» повестть?- Л. Макулов.

8). Ня валхне сявфт «Виде киге» или «Кафта киге» повестьста?

«… Аф стак вдь корхтайхть кодама марлюсь, стама и марьське. Тядянц мархта минь нинге стирьшабакс ялгакс улеме. А алянц кондяма сетьме ломатть шуроста васьфнихть»…. Кинь произведениясь? (Ф. Чеснаковонь « Кафта киге»


9). Кие ня писательхнень эзда шачсь сембода кунара?

( Ф. Чеснаков 1896 к.)

II – це турсь

1. Ёрдамс кубикт, тиемс валхт. (Кие сяда лама буква нолдай тевс).

III – це турсь

1. Кона писательсь шачсь 1917 кизоня, или видеста азомс, Великай Октябрьскяй Социалистическяй революциять пингста? – Г.Я.Меркушкин.

2. Кона писательсь, азость, шачсь розень нума пингста, ума лангса? - Л. Макулов.

3. Кинь аляц ня писательхнень эзда ульсь моряк и шабанц рана тонафтозе лувома? – А. Щеглов

4. Кие сёрмадозе « Од вийсь сотозень» рассказть?

5. Азость, кинь колга моли корхтамась? 1935 кизоня примафоль тонафнема мордовскяй пединституту, а институтть аделамда меле работама Зубово-Полянскяй райононь од Выселкань средняй школав? Кие тя?

IV – це турсь

1. Максови вал, кие арьси сяда кувака вал, ся сяськи.

2. Кие арьси сяда лама валда, ся сяськи

(Кальдявгофтомс)

Налхкомась аделавсь. Максови вал сяськити. Максови казне.