shkolakz.ru 1 2 ... 6 7
Николай Голенков



ТЮШТЯНЬ ТОРАМАЦ


ТЮШТЯНЬ ТОРАМАЦ

Сценка

НАЛХКИХНЕ:

Т о л я

В а н я – кемоньшка кизоса цёранят.

И н е к у й с ь.

М а ш т ы к с с ь.


Тевсь моли вирьса. Оцю, паргана тумоть пряс повфтаф серень торама. Тумоть перьфке якай Инекуйсь Маштыксть мархта. Ванондыхть тумоть пряс, тяряфнихть куцемс, тевсна аф лисенди.

И н е к у й с ь (комоти, фатяй тумоть алудонь тарадонцты, мянцеви куйкс, тяряфни кеподемс пондонц, прай). Ох, ёфси сиредень!.. Сиредемась – аф иредемась, пингти яф янгафтови. Инголи тя шуфтть пряс уркс комотелень. А тяни инь алудонь тарадти аф куцеван.

М а ш т ы к с с ь. Кизотне – аф пизепне, синь лоткамасна аш. Моньге пильгоне стане шулкфтыхть, аф мянцевихть, бта байдек лангса якан. Кядненди бта пудонь сталмоса кяскафт сотнефт – афи кепсевихть. Тяфтама эряфть эзда хуш шини эрьхкста тят лисенде. Ёфси аш вийне ломаттненди кальдяв тефт тиендемс.

И н е к у й с ь. Видеце валце… Тяфтама эряфть эзда монга шини эрьхкозт сембе пингс чопафтан. А вдь тяфтама эряфти Тюштя пачфтемазь. Коль торась серень торамаса, пуропнезень мокшетнень, тонафнезень ладязня эряма, шобда вийхнень сяськондема. И тонафтозень!..

М а ш т ы к с с ь. Ёфси аш тейнек эряф. Эрятама кяшендезь, кивок эздонк аф пели… Кодама тя эряф?..

И н е к у й с ь. Сяка кенярдеманьке: тяни аш Тюштя. Сядот киза вешендень тораманц, штоба эсонза лия морот морсемс. Стама морот, конат кяжияфнелезь мокшетнень и эрзятнень, кошардолезь кальдяв тевонь тиендема.

М а ш т ы к с с ь (кеняртькшнезь). Кда тяфта тиеволь, эста, пади, мрдальхть вийне. Мон кельгса азорондамс ломаттнень ёткса, конат эряйхть аф ладязь, тиендихть фкя-фкянди кальдяв тефт.

И н е к у й с ь. Аньцек торамась коданга сатомс, мон тиян мокшетненди и эрзятненди стама эряф, аньцек сялондомат да тюремат кармайхть азорондама масторсост. (Тага тяряфты куцемс тумоть пряс. Тага тевоц изь лисе. Ювади Маштыксти.) Тон хуш аф ламода лезтт, сире кранч!


М а ш т ы к с с ь. А кода лездан? Корхтан вдь, кядне стане шулкфтыхть, афи кепсевихть, пильгоне аф мянцевихть…

И н е к у й с ь. Тон комак, а мон лангозт шятян. Пади, хуш тяфта алудонь тарадть лангс куцеван.

Маштыкссь комай, Инекуйсь шятяй копоренц лангс, аньцек тяряфты сатомс алудонь тарадть, кафцьке прайхть. Ушедыхть сялондома, фкя-фкянь муворгофнема.

И н е к у й с ь. Селк шини куркцень! (Тошказь.) Сетьмок, кие-бди сай.

Маштыкссь Инекуйть мархта сетьмихть, аф ламос кашт аф молезь ащихть, сяльде кяшихть маласа касы кусторкснень фталу. Тумоть ваксс сайхть Ванянь мархта Толя. Кядьсост кептернят.

Т о л я. Тяса кулевсть вайгяльхть, а кивок аф няеви.

В а н я. Корхнень тейть, тя аф ломанень вайгяльхть, кодама-бди зверьхть уркснесть. Пара, ворьгодсть, стакащемда сивфтелемайть.

Т о л я. И тяса кивок аш. Месендемс тяни? Кода мумс куду кить?

В а н я. Корхнень тейть, аф эряви ичкози тушендомс. Вирть трваса кунара ни пяшкоделеськ кептерняньконь и аськолялеме куду. А тон – аде сяда потму… Тоса пангта лама… Тяни вов тязк, панкнень ваксса, вачеда кулотама… Или врьгасне нефтьсамазь…

Т о л я. Тон анокс тят аварде, сембе сяка листяма.

В а н я. Кода лисят? Вирьса аф кит, аф ятт аш. И кизефтемс аш кинь. (Ушеды тихольдезь авардема.)

Т о л я. Тят аварде… Вов куцян тумоть пряс, пади, тоста мезьге няян.

В а н я. Аньцек пря шнафтат, аф куцеват. И кизефтемс аш кинь (сядонга аварьгоды).

Кусторксть фталда лиси Маштыкссь.

М а ш т ы к с с ь. Мес аш кинь кизефтемс? Мон тясан…

В а н я (эводезь). Вай, а тя кие?

Т о л я (кеподи тарад, кяжиста). Кият тон?

М а ш т ы к с с ь. Мон?.. (Арьси аф ламос.) Мон вирть ваныенц рьвац. Вирьса сембе китнень-яттнень содасайне, сельгонь прамс вяттядязь тоза, коза мярьктяда.

Т о л я. Эста, пади, няфтьсак куду кить?

М а ш т ы к с с ь. Мес аф няфтемс? Няфтьса… Аньцек кда тинць пара тев тихтяда.

Т о л я. Азк, кодама, минь фалу сиренятненди лезнетяма.

М а ш т ы к с с ь. Тевозе ёфси аф стака.

Т о л я. Азк сяда курок тевцень!

М а ш т ы к с с ь. Тевозе тёждя, аньцек тейне аф тиеви, сиренян мон.

В а н я. Вов и азк тевцень.

М а ш т ы к с с ь. Мирдезе тяза сашендсь охотас. Панць зверь мельге, шорясь тейнза торамац, вов и повфтазе тумоть пряс. Кучемань инксонза, сонць сизесь. Тумоть муйне, а вов прязонза аф куцеван – аф сят кизоне. Кда сатсасть торамать, куду вяттядязь.

И н е к у й с ь (кусторксть фталда, салаваня, кеняртькшнезь). Коса шта тонадсь, шяйтан бабась, тяфта васькафнема.

В а н я. Шаронды тумоть перьфке, ванонды прязонза.

М а ш т ы к с с ь. А, пади, тинь аф машттада шуфта пряс куцендема?

Т о л я (прянь шнафтозь). Кие? Минь аф машттама?.. Аф кенерят кизотнень лувомс, мон шуфтть пряса ни улян.

В а н я. Мон шуфта прява аф куцендян, но кда пяк эряви…

М а ш т ы к с с ь. Пяк эряви.

Т о л я. Эста ушетт лувома кизотнень.

Маштыкссь няфти пря, бта луви. Ваня Толянь мархта фкя-фкянди лезнезь ушедыхть тумоть пряс куцема.

М а ш т ы к с с ь (ювади). Кизоне лувовсть!.. А тинь пачкодеде торамати?!

Т о л я. Пачкодеме! Аньцек сон пяк стака! Мархтонза стака валгомс!

М а ш т ы к с с ь. А тинь ёрдасть! Сяльде тинць валомне валктада!

Т о л я. А кда яжави?

М а ш т ы к с ь. Мезьге мархтонза аф тиеви. Тумоть ала модась ляпоня, вельхтяф лопаса.

Цёранятне ёрдасазь торамать. Мзярда ся прай модать лангс, кусторксть фталда комоти Инекуйсь. Фатясы торамать, ушеды палсемонза, тяряфни мянцевозь кштимс.

В а н я (шуфтть пряста). А тя нинге кие?

М а ш т ы к с с ь. Валгода, тяда пеле! Тя монь ялганязе – Инекуйсь! Кулендеде колганза? Сон пяк кельгсыне ёмла церанятнень, сивондьсыне, пакарнятка эздост аф кадонды.

Т о л я. А тон кият?

М а ш т ы к с с ь. А мон Маштыкссь, урмань каннись-явондысь. Валгода сяда курок, Инекуйнязень пекоц вачсь.

В а н я. Аф валктама. Минь ломатть терттяма.

Т о л я. А вона кие-бди сай!

В а н я. Аляй!!! Ау!!! Сак сяда курок тяза!

И н е к у й с ь (пелезь ванонды перьфпяльге). Пинге ворьгодемс!

М а ш т ы к с с ь. Эряви сяда курок кяшемс! Сандяряй оцю ломань, тага байдекса ляпоптьсыне копореньконь.

И н е к у й с ь. Ворьгодемс кенерьхтяма. Ожу, тяряфтан морамс. (Мезе вийса уфай торамати. Мора вастс кулевихть куфкснемат, тжнамат, куйнь вяшкомат.)

М а ш т ы к с ь. Мес-бди аф морай.

И н е к у й с ь. Таштомсь, улема. Пади, потмоцка шямониясь.

М а ш т ы к с с ь. Тяряфтт тага. Пади, лиси тевце, пади, кяжияфтовихть мокшетне и эрзятне. Тюштя вдь морсесь мархтонза.

Т о л я (шуфтть пряста). Минь вона мезе тейст максоме, сонцень Тюштянь тораманц! Мон лама колганза кулендень сире ломаттнень эзда. Сон лездсь пуроптомс марс мокшетнень и эрзятнень. А минь сонь Инекуйти казеськ. Тяни сон тии тефт…

В а н я. А мезе тии?

Т о л я. Тии лама кальдявда. Тя вдь торамась волшебнай…

И н е к у й с ь. Эх, тняра киза эсонза вешендень, а сон аф кондясти.

М а ш т ы к с с ь. Тяряфтт тага. Пади, ашезь гастяв, пади, моразеви.

Инекуйсь тага уфай.

Т о л я ( шуфтть пряста). Мзярс тяда уфсе, сембе сяка аф моразеви.

М а ш т ы к с с ь. Мес аф моразеви?

Т о л я. А сяс, мес эрь тевса маштомс эряви.

М а ш т ы к с с ь. А тон маштат?

Т о л я. Шарьхкодеви, маштан, мон вдь музыкальнай школаса тонафнян.

И н е к у й с ь. А, пади, моньге тонафтсамак? Эста аф сифтядязь, а сият-золотат максан. Мезе мяленте, сянь раматада.


Т о л я. Мон тонафтолихтень, да пелян валгомс. Аф кенерян модать лангс шятямс, сивсамак.

И н е к у й с ь. Тяда пель. Мон цёранянь сивольть аф кельгса. Кда улеледе стирнят, эста, пади, сиволедязь.

В а н я. Аф верондатама тейть.

М а ш т ы к с с ь. А тейне верондатада? Мон паньца тяста Инекуйть, сон пяк пелькс. Тейне няфтьсасть, кода морсихть торамаса, эста куду вяттядязь. И сияда максан сняра, мзяра кептернязонт тяльги.

В а н я (тошказь). Тага васькафтсамазь.

Т о л я. Хуш весть васькафтомасть, сембе сяка аф пельхтяма эздот. Катк Инекуйсь туй кусторксть фталу, а тон венептьк торамать, мон и няфтьса, кода эряви морамс. Аньцек макст вал, што омбоцеда аф васькафтсамасть, а вятьсамасть куду.

М а ш т ы к с с ь. Мода варяс ваялень, аф карман васькафнемонт. (Норгсы Инекуйть кядьста торамать, сяряфтсы сонь кусторкснень шири, тошказь.) Кяшть аф ламос.

Инекуйсь туй кусторкснень шири, Маштыкссь венептьсы цёранятненди торамать.

Т о л я. Вай, кодама стака… Аф цёранянди тиф. (Ванянди). Лезтт, ялгай, кирдемс, а мон тяряфтан морамс.

И н е к у й с ь. Тяряфтт, тяряфтт, ёнюняй. Кда лиси тевце, сяльде моньге тонафтсамак. Куду вятте, сият-золотат максан…

Толя ушеды морама. Инекуйсь Маштыксть мархта инголи кенярдихть, тяряфтыхть маладомс тумоти, сатомс церанятнень. Синь эсост бта аф няеви вий сяряфты, бта виидонга вии варма тяряфни уфамс шобда вийхнень тумоть маласта.

И н е к у й с ь. Лоткак, шяйтан лефкс! Прязе лопади тяфтама мороть эзда!

М а ш т ы к с с ь. Нельк кядьстост торамать! Мода варяс панихть эсон моронза!

В а н я. Морак! Морак, Толя! Панить тяста шобда вийхнень!

Маштыкссь Инекуйть мархта пандсазь пилеснон, туйхть ласькозь тумоть маласта. Толя лоткай морамда. Кулевихть вайгяльхть: «Ау! Толя!» «Ваня! Косат?!»

В а н я. Тясан!

Т о л я. Тясотама!


Цёранятне валгихть шуфтть пряста, туйхть ласькозь вайгяльхнень шири.

З а н а в е с.


НОЛА ОЦЯЗОРХТ

Сценка


НАЛХКИХНЕ:

О ц я з о р с ь.

И в а н – оцязорть цёрац.

Н а с т а – мокшень стирь.


ВАСЕНЦЕ КАРТИНАСЬ

Оцязоронь куд. Сембось ёряф, прафнеф, бта давол ётась. Васта лангса матф оцязорсь.

О ц я з о р с ь (кургонь афнезь). Пинге стямс, тевс кярьмодемс, да нолашись, улема, корязон инголи шачсь. Мзяра шта пингсь? Эх, эряф тусь. Кизефтемска аш кинь, сембе работниконе ворьготькшнесть. Лядсь аньцек церазе Иван. Аньцек сонга нола: аф пенгянди, аф ленгянди. Школав изь яка, а тяни утци корязон ламос. Коса шта сон? (Ювади.) Иван! Косат?

И в а н (ювади лия комнатаста). Тясан. Мезе эряви?

О ц я з о р с ь. Тяза сак, корхнемс эряви.

И в а н. Корхнек тозк, мон лац кулян.

О ц я з о р с ь. Сак, мярьгонь, тяза! Корхтамазе ули.

Сувай модяряф щамса, тапаряф шяярь од цёра. Фкя кядьсонза шовсесы пеконц, омбоцеса – сельмонзон.

И в а н (аф мяль вельде, кургонь афнезь). Мезе лиссь? Корхтак.

О ц я з о р с ь. Озак ваксозон, корхтаманьке ули кувака.

И в а н (озай алянц пильге пес). Кда кувака корхтамаце, мадан (веляй вастти).

О ц я з о р с ь (сяряфтсы пильгса). Хуш весть озак ломанькс и азонтк тейне, кода сяда тов ёрат эрямс?

И в а н. Кода эрянь, стане и карман эряма.

О ц я з о р с ь. А кда кулан, мезе кармат тиендема?

И в а н. Калмате и вастсот утцема карман. Тонь вастце сяда кели и ляпе.

О ц я з о р с ь (тюфади). Тейть хуш коняти, хуш пря ланга каяк, сембе сяка ёньц аф кундат. Няйсак вдь, сиредень.

И в а н. Няйса.

О ц я з о р с ь. Пинге тейть странань вожиятне сявомс, а тон нинге шабань ёньца эрят. Оцязоронь тефненди кеме кядь эряви.


И в а н. Монь кядне аф лафчт. Кда эрявксты, клокса кевтьке лазса.

О ц я з о р с ь. Ся тевсь аф стака, ёфси лия вожиянь кирдемась.

И в а н. Косот синь? Няфтить, а то кулат, вешендемс савихть.

О ц я з о р с ь (тага тюфади). Ся аф алашань да букань вятнемс вожият. Синь эрявихть пряса кирдемс. Странать вятемс, аф бука айдямс. Тяса ёнь эряви. А тон ашеть тонафне и тяни аш мяльце кулхцондомс.

И в а н (салаване, ваныхненди). Ули кинь эзда кепотькс сявомс. (Кайгиста.) Эста тонць тонафтомак, кулхцондан.

О ц я з о р с ь. Аф тяса, а школаса эряволь тонафнемс. А тон тоса каруфт кунцеть.

И в а н. Синь удомс шорсесть.

О ц я з о р с ь (кяжиста). Саты утцемс. Мон ламос арьсекшнень и сань мяльс – эряват рьвяяфтомс.

И в а н. Тяза лама ёнь аф эряви. Эрь стирсь ласьки рьвакс оцяронь цёранди. Аньцек кяжи афоль пов.

О ц я з о р с ь (салаваня). А тонь хуш стирь ялгаце ули? Азк, кие. Коза кудат кучемс?

И в а н. Мала ялгазе аш. Но мумац ёфси аф стака. (Няфти кядьса ваныхнень шири.) Няйсак, мзяра стирьда пуромсь! Аньцек фкя сурозень мяньца – кемонь эздост ласьки.

О ц я з о р с ь. Аньцек тят сявонде мокшетнень ёткста. Синь сембе рдазса кассть, сёрмас аф содайхть, ёфси лацот шава прянят. Аф эряви тейнек тяфтама.

И в а н. А кодама эряви?

О ц я з о р с ь. Стама, кодама Иван царевичсь ёфксса мушендсь. Мяляфтсак царевна-ватракшть колга ёфксть?

И в а н. Афи кулендине, а лувома аф маштан.

О ц я з о р с ь. Эста кулхцонтт. Ся ёфксса оцязоронь церась ляцсь налса. Налоц повсь шяйс, царевна-лягушкати. Ся ватракшсь сяльде арась мази стирькс. Ёфкссь кувака, марнек азондомс нолгадан. Лятфтаса аньцек сянь, што цебярь пец. Вов и тейтьке эряви ляцемс налса. Коза прай налце, тоста и вятят рьвя. Оцязоронь налсь аф васькафни.

И в а н. Штоба ляцемс, догомня эряви. А тон тейне ашеть рама. Коста сяван?


О ц я з о р с ь. Эстейть кунара мяндемаль. А тон догомняста, пади, ляцендема аф маштат. Ужели, инксот сави ляцемс? Кантк атязень догомнянц, сон цюланца пулиякшни. И нал тят юкста.

Иван туй, курокста мрдай догомня и нал мархта. Ушеды шарфнема эсонза: и сялдаззонза щафтсы, и пильгса тяряфты ускомс догомнянь пикскять. Меколи кода аф кода ладявсь налсь, ляцсь.

И в а н. Аф тёждя тя тевсь - догомняста ляцемась.

О ц я з о р с ь. Сяда стака налть мумац.

И в а н. Мезе-мезе, а вешендема маштан (туй).


ОМБОЦЕ КАРТИНАСЬ

Велень куд. Вальмять ваксс озаф Наста. Сюреса сёрмады нардама, морай:

Вай, паксяса, вай, паксяса,

Вай, келунясь люкай.

А ся келунять вакскава

Монь кельгомазе сай…

Прай инголенза оцязоронь налсь.

Н а с т а. Вай, а тя мезе? (Кеподьсы налть, ушеды ванондомонза.)

Ласькозь сувай Иван. Наста кяшсы налть.

И в а н. Шумбрат, мокшава, конань пряц шава.

Н а с т а. Шумбрат, пара ломань. Озак, азонтк, кодама тев тяза вятензе?

И в а н (прянь няезь). Мон сай пингонь оцязоронте, оцязорть цёрацан.

Н а с т а. Вай, Шкабаваз. А мон эводень, арьсень, вирьста салай-колай ломань сась. Ётак, оцязор-батюшка, тят нулгоде ярхцамбяленьконь эзда, ярхцак, а тоса азондсак, кодама тев тяза вятензе.

Наста шрать лангс путы пачат, шову поза. Иван ярхцай.

И в а н (пяшксе куркт). Танцтихть мокшетнень ярхцамбяльсна.

Н а с т а. Инголи ярхцак, меле корхнетяма, азондсак, кодама шкайня пялонк кучензе.

И в а н. Кодамовок аф шкай. Пара ломатть няезь и азозь, бта тя шири налозе лийсь. Вов и сувань кизефтемот, пади, тонга няить?

Н а с т а. А-а-а, сянь, конань оржа нярец и зрнякс пиндолды.

И в а н (ярхцамбачк люкафтсы прянц). Сянь, сянь. Азк сяда курок, коза прась?


Н а с т а. А мезенди сон эряви?

И в а н. Ся налсь волшебнай. Коза прай, тоста рьвя сяван. Аньцек рдазу мокшетнень ёткс афоль пра.

Н а с т а (ваныхнень шири). Ванода лангозонза: сонць кафтошка недяля шаманц ашезе шта, а рдазуфт вешенди. (Кайгиста.) Аш, ашень няенде кодамовок нал.

И в а н (шовасы пеконц). Пяшкодсь кептернясь, тяни мадомс пара. (Настанди.) Мзярс ваймосян, тон ласьконтть алязенди и азк, кле, лоткань пялот, тейне эряви лезкс. Пелян, ськамон аф муви налсь. Катк лездыхть кучи. А кда ломаненза аш, катк лия нал максы.

Н а с т а. Сон тейне аф верондай, нинге пикссесамань. Оцязорхне фалу кяжихть. Тон серманя тяштть.

И в а н. Сёрмадома аф маштан, валса семботь азк.

Н а с т а (дивандазь). Вов тя оцязор! Сермадома аф машты! Месендеть шта школаса?

И в а н. Эсь кяльсот тят лапа, сяда курок ласьк. Фкя пильгце тяса, омбоцесь – тоса. Ласьк вишконяста, но тят эряскода, мон курокста аф сргозян. Аньцек семботь тик стане, кода мярьгонь. Шарьхкодеть?

Н а с т а (люкштядьсы прянц, лиси, якай сценать трвава, арьсезь корхтай). Месендемс тяни? Кда няфтьса налонц, сембе пингс сявсамазь тя шава прять, нолга тулоть мархта эряма. Сяда пара калмос мадомс. Ожу, сон ёрай мумс рьвя, кода ёфксса. Вов и тиемс эряви сембось, кода ёфксса. Бохарямсонк мода ватракшта лама. Мутама тейнза рьвя (рахазеви, туй).


КОЛМОЦЕ КАРТИНАСЬ

Оцязоронь кудсь. Оцязорсь матф сяка вастонц лангса. Сувайхть Наста Иванонь мархта. Иван кандсы руцяняса ашкотф ватракшть.

И в а н. Кеняртькшнек, аляй! Мунь рьвя! Аньцек эряви учемс, мзярда ёрдасыне щамонзон.

О ц я з о р с ь (аф мяль вельде). Кие рьвяце? Тя мокшень стирсь?

И в а н. Аф. Сон аньцек лездсь мумс налозень и ватракшть. Тяни каземс эряви, и катк туй, коза няихть сельмонза.

О ц я з о р с ь (пильгста пряс ванцы Настань). Мазият стирсь, аньцек тейнек мокшет аф эрявихть. И каземска аш мезе. Архт, стирняй, куду, катк Нешкопазонте максы.


Н а с т а (сюконяй карксэземга). Спасиба пара валонкса, оцязор-батюшка. Эряда павазуста, а тейне казнет аф эрявихть. Пара хуш ашемасть пикссе. (Тага весть сюконяй карксэземга, лиси.)

О ц я з о р с ь. Тяни няфтьк афкуксонь рьвяцень.

И в а н (орадсы сюлмонять, няфтьсы мода ватракшть). Вов павазоньке! Тяни аф эряф туй, а ёфкс. Ваймосек, маконяй, ляпе стулня лангса. (Путсы ватракшть оцязоронь тронть лангс.) Ваймак и ёрдайть нулготькс щапнень.

О ц я з о р с ь. Аф васькафнихть, улема, ёфксне. Сельминголе кармась полафтовома церазе. Тяфта, ванат, ёньцка кундай. Ули кинди царствазе максомс.

И в а н. Ки лангста мадан, а тон, аляй, лацкас ватт рьвязень мельге: афоль пра, афоль токав. Мон туян эсь вастозон (ёрай тумс).

О ц я з о р с ь. Ожу, цёрай, ожу. Рьвяце стулть лангста комотсь, вастть алу кяшсь. Таргак тоста сяда курок! Пади, токавсь, афоль кельмофтев.

И в а н (эци вастть алу). Косат, маконязе? Косат, тяконязе? Тят кяшенде! Листь тоста, ёрдайть нулготькс щапнень.

Цёранц мельге вастть алу эци оцязорське. Сонга вешенди. Вальмава варжаксты Наста.

Н а с т а (пеедезь). Тяфта тейнть и эряви, нолга тулот. Ашель тевонте, тяни ваннесть ватракшть. А мон туян, мокшень цёра муян. (Туй.)


З а н а в е с.



следующая страница >>